എഴുത്തുകാരന്‍
ഭീരുവോ ധീരനോ ആവേണ്ടതില്ല . അയാള്‍ തന്റെ ഭീരുത്വത്തെക്കുറിച്ചോ
ധീരതയെക്കുറിച്ചോ ജാടവര്ത്താനങ്ങളോ ഗീര്വാണങ്ങളോ അടിക്കേണ്ടതില്ല .
സ്വന്തം ഭാഗം ന്ന്യായീകരിക്കാന്‍ കരുണരസം കരകവിയുന്ന വൈകാരിക പ്രകടനങ്ങള്‍
നടത്തേന്ടതില്ല . അതിമോഹങ്ങളില്‍ നിന്നും മാധ്യമ ശ്രദ്ധ കിട്ടാനുള്ള
തത്രപ്പാടുകളില്‍ നിന്നും ആര്ത്തികളില്‍ നിന്നും ഇരിപ്പിടങ്ങളില്‍ നിന്നും
വേദികളുടെ വെട്ടിത്തിളക്കങ്ങളില്‍ നിന്നും അകന്നു നില്‍ക്കാനുള്ള
പ്രശാന്തമായ ജാഗ്രത കാണിച്ചാല്‍ മതി എന്ന് ആര്‍. രാമചന്ദ്രന്‍ സ്വന്തം
ജീവിതം കൊണ്ട് തെളിയിച്ചു . ഒരു സാഹിത്യക്കൂട്ടായ്മയിലും ചെന്നു നിന്ന്
പൊങ്ങച്ചം പറഞ്ഞില്ല.ആരാധകരുടെ സ്തുതികളില്‍ രോമാന്ച്ചമണിഞ്ഞില്ല .
അപാരജ്ഞാനിയായിരുന്നിട്ടും പാണ്ടിത്യപ്രകടനങ്ങള്‍ നടത്തിയില്ല . സ്വയമൊരു
കവിതാനിര്‍മ്മാണഫാക്ടറിയായില്ല . അനുയായിവൃന്ദത്തെ ഉണ്ടാക്കിയില്ല .
രാഷ്ട്രീയപാര്ട്ടികളുടെയോ അക്കാദമികളുടെയോ സൌജന്യങ്ങള്‍ക്കായി കാത്തു
നിന്നില്ല . അവാര്‍ഡുകള്‍ സംഘടിപ്പിചെടുക്കാന്‍ ശ്രമിച്ചില്ല . കിട്ടിയ
അവാര്‍ഡുകളെക്കുറിച്ച് വീമ്ബിളക്കിയില്ല . കേന്ദ്ര സാഹിത്യഅക്കാദമി
അവാര്‍ഡു കിട്ടിയപ്പോള്‍ വമ്പന്‍ സ്വീകരണ സമ്മേളനങ്ങള്‍ നടത്താന്‍
ഒരുങ്ങിപ്പുറപ്പെട്ടവരെ സൌമ്യമായി തിരസ്കരിച്ചു . കാവ്യച്ചര്ച്ചകളില്‍
തന്റെ പേരു പറയാത്തവരെ ശത്രുപക്ഷത്ത് നിര്‍ത്തിയില്ല .കവിതയ്ലെ
പുതുധാരകളോട് തുറന്ന സമീപനം സ്വീകരിച്ചു. മനോഹരമായ ഇന്ത്യന്‍ യാത്രകള്‍
നടത്തിയിട്ടും അതിനെക്കുറിച്ച് ഒന്നുമുരിയാടിയില്ല . ഞാനിതാ ലോകസഞ്ചാരം
നടത്തുന്നത് കാണുന്നില്ലേ , ലോകകവികളുമായി സൗഹൃദം സ്ഥാപിക്കുന്നത്
കാണുന്നില്ലേ , ലോകകവിതാ സമ്മേളനങ്ങളിലും ലോകസാഹിത്യോല്സവങ്ങളിലും
നിരന്തരം പങ്കെടുക്കുന്നതു കാണുന്നില്ലേ എന്ന് വിളിച്ചു
കൂവുന്നവര്‍ക്കിടയില്‍ ആര്‍.രാമചന്ദ്രന്‍ എന്ന മനുഷ്യന്റെയും കവിയുടെയും
മൌനത്തിന് സദാത്മകമായ അര്‍ഥം കൈവരുന്നു . വിവേചന ശീലമുള്ള ഒരു വായനക്കാരന്
ഒരു കവിയുടെ ബിരുദങ്ങളോ അയാള്‍ക്ക്‌ ലഭിച്ച അവാര്‍ഡുകളോ അയാള്‍ എത്ര
ലോകസാഹിത്യോല്സവങ്ങളില്‍ പങ്കെടുത്തിട്ടുണ്ട് എന്നതോ പ്രധാനപ്പെട്ട
കാര്യമല്ല . അയാളെ സംബന്ധിച്ച് ഒരു കവിയുടെ കവിതകളാണ് ആത്യന്തികമായി മൂല്യ
നിര്‍ണയത്തിന്റെ വിഷയം . ആ അര്‍ത്ഥത്തില്‍ കൊണ്ടാടപ്പെടുന്ന
പലകവികളെയും കാലം ചവറ്റുകുട്ടയില്‍ എറിഞ്ഞാലും എഴുതിയ എണ്ണം പറഞ്ഞ
മികച്ച കവിതകള്‍ കൊണ്ട് ഭാവിയിലെ വിവേകശാലിയായ വായനക്കാരനെ ആര്‍.
രാമചന്ദ്രന്‍ അഭിസംബോധന ചെയ്തുകൊണ്ടിരിക്കും . ആരവങ്ങള്‍ക്കും
പൊള്ളത്തിളക്കങ്ങള്‍ക്കുമപ്പുറം ആര്‍. രാമച്ചന്ത്രന്‍ എന്ന മനുഷ്യന്റെ
കാന്തി വര്‍ദ്ധിച്ചുകൊണ്ടിരിക്കും . ആര്‍ രാമച്ചന്ത്രനെ പരിചയപ്പെടാനും
കുറച്ചുകാലം അദ്ദേഹത്തോട് അടുത്തിടപഴകാനും കഴിഞ്ഞതില്‍ ഞാന്‍ ഊറ്റം
കൊള്ളുന്നു.
No comments:
Post a Comment