അങ്ങേയറ്റം
സംസ്കാര സമ്പന്നരാണ് ആദിവാസികള്‍ . അവരെ അവരുടെ ആവാസവ്യവസ്ഥയില്‍ വെറുതെ
വിടുക . അവരുടെ ഭൂമി അവര്‍ക്കായി യഥേഷ്ടം നല്‍കുക . അവരെ അങ്ങോട്ടു
ചെന്ന് ഒന്നും പഠിപ്പിക്കാതിരിക്കുക . അവര്‍ നാഗരികരെക്കാള്‍ എത്രയോ
അറിവുള്ളവര്‍ . അവര്‍ക്ക് പ്രശ്നങ്ങള്‍ ഉണ്ടാക്കിയതിന്റെ ഉത്തരവാദിത്വം
മുഴുവന്‍ അവരുടെ സഹജവും ജൈവവുമായ സ്വാഭാവിക ദിനസരികളിലേക്ക് നുഴഞ്ഞു കയറി ആ
സ്വാഭാവികതയ്ക്ക് ഭംഗം വരുത്തിയ കടന്നുകയറ്റക്കാര്‍ക്കും
ലാഭക്കൊതിയന്മാരായ ഇടനിലക്കാര്‍ക്കുമുള്ളതാണ് . അവരെ വീതംവെച്ചെടുക്കാന്‍
കച്ചകെട്ടിയിറങ്ങിയിരിക്കുന്ന രാഷ്ട്രീയ പാര്ടികള്‍ക്കുള്ളതാണ് .
ആദിവാസികളുടെ പ്രശ്നങ്ങള്‍ മനസ്സിലാക്കണമെന്ന് ആത്മാര്‍ഥമായി രമേശ്‌
ചെന്നിത്തല ആഗ്രഹിചിരുന്നുവെങ്കില്‍ അനുയായിവൃന്ദത്തെ ഒഴിവാക്കി
,മാധ്യമങ്ങളെ അകറ്റി നിര്‍ത്തി, വാഹനങ്ങളുടെ അകമ്പടികളിലാത്തെ ആദിവാസി
ഉരുകളിലേക്ക് അതീവ വിനയത്തോടെ പോകണമായിരുന്നു . സ്വീകരണ സമ്മേളനങ്ങള്‍
പോലുള്ള പ്രകടനങ്ങള്‍ ഉപേക്ഷിക്കണമായിരുന്നു . ആദിവാസികളുടെ വിശിഷ്ട
ഭക്ഷണം കഴിച്ചുകൊണ്ട് ,അവരെ ആദരിച്ചുകൊണ്ട്‌ ,അവരുടെ അറിവിനുമുന്പില്‍
നമ്രശിരസ്ക്കനായി കുറച്ചു ദിവസം അവരുടെ കുടിലുകളില്‍ കഴിഞ്ഞു
കൂടണമായിരുന്നു . അതിനുള്ള സമയവും സൌകര്യവും ഇല്ലെങ്കില്‍ ദയവായി ഇത്തരം
പ്രഹസനങ്ങള്‍ ഒഴിവാക്കാനുള്ള മാനുഷികതയെങ്കിലും ,ആര്‍ജവമെങ്കിലും
കാണിക്കുക . എല്ലാ രാഷ്ട്രീയക്കാര്‍ക്കും ഇടയ്ക്കിടയ്ക്ക് ചെന്ന്
നാടകമാടാനുള്ള കളിയരങ്ങല്ല ആദിവാസി ഊരുകള്‍ .
ഇന്ത്യന്‍ജനാധിപത്യഘോഷയാത്രയുടെ പിന്നില്‍ പോലും ഇടം കിട്ടാത്ത്തവര്‍ .
അവരെ വെറുതെ വിടുക. അവരെയെങ്കിലും കക്ഷിരാഷ്ട്രീയത്തിന്റെ ലാഭച്ചന്തയില്‍
വില്പനയ്ക്ക് വെക്കാതിരിക്കുക.ആദിവാസി ഊരുകളില്‍ പോകാനുള്ള രമേശ്‌
ചെന്നിത്തലയുടെ ജനാധിപത്യ അവകാശത്തെ ആരും ചോദ്യം ചെയ്യുകയില്ല . എന്നാല്‍
ആദിവാസി ഊരുകളില്‍ പോകുന്നവര്‍ എല്ലാ പരിവേഷങ്ങളും വാഗ്ദാനവഞ്ചനകളും
മാറ്റിവെച്ചുകൊണ്ട് വെറും മനുഷ്യരായി അവിടേക്ക് കടന്നു ചെല്ലാനുള്ള
മഹത്തായ വിവേകം കാണിക്കണം എന്ന് സൂചിപ്പിക്കുക മാത്രമാണ് . ദശകങ്ങളായി
ജനാധിപത്യത്തിന്റെ തിളങ്ങുന്ന ആഘോഷങ്ങളില്‍ നോക്കുകുത്തികളാക്കപ്പെട്ട
ആദിവാസിസമൂഹങ്ങളോട് അത്രയെങ്കിലും സത്യസന്ധരാകാനുള്ള സന്മനസ്സെങ്കിലും
ജനാധിപത്യ വിശ്വാസികള്‍ എന്ന് സ്വയം കൊട്ടിഘോഷിക്കുന്ന ഓരോ
രാഷ്ട്രീയക്കാരനുമുണ്ടാകണം .വൃത്തിയും വെടിപ്പുമുള്ളവര്‍ ചെന്നുചെന്നാണ്
,അവരുടെ വൃത്തിയുള്ള ഭാഷയിലെ പൊള്ളവാക്കുകള്‍ വീണുവീണാണ് ആദിവാസി ഊരുകള്‍
വൃത്തികേടായത് . അവിടേക്ക് കടന്നു ചെല്ലുന്നവര്‍ക്ക്
വിവേകശാലികളാകാന്‍,വിനയാന്വിതരാകാന്‍ ഈ ചെറിയ അറിവ് മാത്രം മതിയാകും.
No comments:
Post a Comment